2Cor 4 | GbrGAW | STEP | Shekwoyi nagayi tnu-tnu ye, dna nwo sun-sun-gye, ntuce nu yi ta gmi bugba yam,

2 Corinthians 4

1 Shekwoyi nagayi tnu-tnu ye, dna nwo sun-sun-gye, ntuce nu yi ta gmi bugba yam, 2 Yi ta dna aza kwoce nu ge ɓa ga gaiciyam, yi to ce pma aza ɓa ga gaiciya nɓo n Shekwoyi ɓeda to dam. A vinyikwo ɓo yi, yi ta ye ɓam. Ama yi da gaiciya nu n Shekwoyi abye, ntuge oza nwa wo yi ɓeda wa gwo kwo.

3 Gama ndai waʼazi ye n yi zhin nyi, ko bwi shi nu, ko ɓei bwi shi n aza ba nu kawai, n ɓa to wye-wyeyi lo m. 4 Ɓa ta ga gaiciya lom, ntuge oɓa ɓo nubozhin fi lo a wyegma. Shetam nu nafi ɓa ɓo. Wo ta ye ge ɓa gye buzangna n kwo ɓe oɓa ʼba nyi m. Buzangna n kwo kun n nabari manayi aba n ko wu Yesu Kristi latu nyi, n wo nu zhin Shekwoyi degbe nyi. 5 Gama yi ta zhin eyi hin nu waʼazi m, yi zhin Yesu Kristi nu waʼazi, n wo zhin Dagayi nyi, eyihin ce yi zhin fye abara nu, ntu Yesu Kristi ɓo. 6 Shekwoyi n wa cige, “Buzangna ɓa knaya n wyegma aba nyi,” owo nu na zhin owo buzangna kwoi ɓe ya bugba, kwoi ɓe yi buzangna n Shekwoyi latu yekpe yi, nkwo nyi n Yesu awyeba nyi.

Ashanpa Awun-wun-yi Ya

7 Kwo shiko nyi yi arziki zafun nya ye yi lo, yi wu lo ngye ozun shakun mi nya nu kurum. Kwa wu ge iko lo n Shekwoyi aba nu, toge n yi aba m.

8 Yi sin wahala ci-ci ama kwo taviyi yam, nsahoi ya zhin shakka, ama eyi wyetu ta zo m. 9 Anuwun yi lo n mwa, ama yi to tna nugundo lom, njesun nsahoyi, yi zhin ya bwa aci n mwa yi to fi ntu ce m. 10 Nsahoi yi zhin ya la Yesu fi-fi dna n yi anayi n nabai agye owo wye-wyeyi dna n yi anayi.

11 Dna yi wye-wyeyi vinya, yi fi wahala efi nya ntu Yesu ɓo, ntuge aza ɓa gye Yesu n yi anayi fi-fi-yi. 12 Deye kwa wu ge efi lo tnu-tnu lo n yi, ama wye-wye yi lo n fye. 13 Littafiʼa da ge, “Mi ɓei daɓo ntuge mi la gaiciya ga.” Dna zafun gaiciya nya ye yi daɓo ce, ntuge yi ku gaiciya ga. 14 Yi kpe lo ge Shekwoyi n wo ɓei la Yesu kala n vingwo nyi, woi ɓei kuyi kala n Yesu yi, har woi ɓe n yi ɓedo n fye yi n wo aba. 15 Deye vinya kwo nyi ntu fye ɓo nu kurum, gama shi Shekwoyi alheri ɓei si aza ba n mwa, ɓa zhin aduwa n mwa godiya nya ntu ge Shekwoyi wa bwa latu.

16 Ntucenu yi ta bwa bugba bmayam. Ko shi kwo nyi eyi nayi bwa konya lo-lonu, ama eyi zafun ɓe-ɓe nu ci-ci. 17 Wahala ɓiyi ye n yi sin kwo nyi kwa, kwo ta mwasa m. Amma kwo ɓaɓe yi mwa-mwa dnagmayi nyalo-nyalo nya, n du eyi wahala ye. 18 Gama yi zhin ya hankali dna, n anya nu n nata gyeɓa wyem. Nya aza gye kwo ta mwa sam, ama nya aza ta gyem, okwonu mwasa so-sai har nyalo-nyalo.